Il-Konsagrazzjoni tal-Knisja

L-Isqof de Bussan

Illum qed niċċelebraw is-solennità tal-konsagrazzjoni tal-Knisja parrokkjali tagħna. Kien fl-ewwel ta' Mejju 1729 illi l-Isqof Paolo Alpheran De Bussan ikkonsagra dan it-tempju minn ġewwa u minn barra. Bierek ukoll bi żjut qaddisa t-tnax-il salib li nsibu ma' kull pilastru u mal-artal maġġur. Għaldaqstant, din is-sena qed niċċelebraw 294 sena mill-konsagrazzjoni tal-knisja maestuża tagħna. (Pace 2023)

Ħafna Siġġiwin li kienu preżenti dakinhar żgur jiftakru sew it-tqegħid tal-ewwel ġebla tal-knisja li kienet tqiegħdet ħamsin sena qabel fejn kienet saret purċissjoni bis-Sagrament mill-knisja l-qadima lejn il-knisja hekk imsejħa l-"ġdida". (Pace 2023)

Pavaljun Triq il-Kbira (Armar Siġġiewi 2023)

Illum nistgħu naraw tifkira tal-konsagrazzjoni tal-knisja fuq irħama lejn in-naħa ta' wara tal-knisja, taħt l-gallarija tal-orgni fejn fuqha nsibu skrizzjoni bil-Latin tfakkar din il-ġrajja (Pace 2023). Fil-festa tal-patrun San Nikola Triq il-Kbira tkun mżejna b'pavaljuni b'arem ta' isqfijiet li kellhom rabta speċjali mas-Siġġiewi. Għaldaqstant, il-Grupp tal-Armar 6 ta' Diċembru wkoll ħa ħsieb li jfakkar dan l-avveniment billi kkummissjona pavaljun f'din it-triq bl-arma tal-Isqof de Bussan.

Referenzi

Pace, J. M., 2023. Il-Knisja Parrokkjali ta' San Nikola ta' Bari fis-Siġġiewi. Qrendi: Best Print.